ENGLISH
KAJA MILAČIĆ U OGLEDALU: Žaliti se na premale honorare i publiku je amaterski
Vesnu Milačić Kaju javnost uglavnom prepoznaje po tome što je bila nekadašnja pjevačica benda ,,Crveno i crno”. Kasnije se oprobala i u bendu ,,Dobri momci”. Ona se već dvije godine ne bavi pjevanjem. Napravila je pauzu i kaže da to, svakako, ne znači, da je napustila svijet muzike.
foto:facebook
Na šta Vas asocira djetinjstvo?
Pjesma Geri Rafertija ,,Bejker Strit” je obilježila veliki dio mog djetinjstva i možda me na neki neobičan način okrenula muzici. Kada je čujem na radiju, preplave me boje, vrate mi se sjećanja na mirise i kako radio slušam samo u kolima, prestajem da psujem pješake i druge vozače (što mi je čest običaj).
Sjećate li se prvog zarađenog honorara? Kako ste ga potrošili?
Ako ne računamo prve plaćene prateće vokale u studiju, prvi ozbilljniji honorar sam dobila za koncert u beogradskom studentskom gradu, održanom povodom proslave 25. maja (osamdeset i neke). Pjevala sam prateće vokale Biljani Krstić koja je tada još uvijek plovila vodama pop muzike. Honorar nije bio astronomski, mada prenesen u današnje uslove nije bio ni zanemarljiv. Kupila sam walkman i starke… Skromna djevojčica!
Na čemu insistirate u poslu?
Odgovornost prije svega. Ako sam se dogovorila da nešto odradim, ima da dođem na vrijeme i budem odmah spremna za rad. Isto očekujem i od kolega, mada to često nije bio slučaj. Žaliti kasnije se na loše uslove, malo publike ili premali honorar je krajnje amaterski.
foto: facebook (Aleksandar Jaredić)
Koju knjigu/film bi preporučili?
Martin Idn Džeka Londona, nije trenutno naročito popularna knjiga, no ipak ispuni dušu većom ljepotom nego 50 nijansi današnjih farbanja! Nedavno sam gledala film novije ruske produkcije – Levijatan. Film veoma otvoreno govori o svijetu pomjerenih moralnih vrijednosti.
Koje jelo najviše volite?
Potpuno sam luda za grčkom kuhinjom! I ja, a i ukućani. Sofrito, specijalitet sa Krfa sam dovela do perfekcije, suvlaki (ražnjići) i zaziki salata su nam omiljeni, a vazda se prejedem punjenih paprika (bez mesa) sa mirisnim mediteranskim biljem. Ipak, svekrvine punjene paprike u sosu od paradajza su još uvijek na pijedestalu Milačića!
Šta je potrebno za pravu ljubav?
Dvoje normalnih ljudi. I neka hemijska reakcija… 🙂 Ukoliko mislite na ljubav muškarca i žene. Za onu bezuslovnu, prema životu, umjetnosti, prirodi i najvažnije djeci ili roditeljima nije potrebno ama baš ništa!
Kojeg umjetnika biste oživjeli da možete i zašto?
Voljela bih da Peter Gabriel, Annie Lennox i Joe Satriani žive zauvijek. Jer je njihova muzika unijela beskrajnu ljepotu u moj život. Sa Mark Tvenom bih voljela da proćaskam povremeno.
Putovanje koje pamtite?
Svako na kojem smo bili nas četiri gusara! Prošlog ljeta smo obilazili manastire na Meteorima. Nikada neću zaboraviti oduševljenje moje djece i paniku moga muža! ,,Tata, zašto si nas doveo ovde, ako se toliko plašiš stepenica?” Djeca su bila spremna da zavire u svaki kutak, obiđu svaki manastir, popnu se na svaku stijenu. Ali je tata od straha zbog njihove bezbjednosti ovu ekskurziju proveo prilično nervozan!
Pjesma vašeg života je?
Ima ih više: Gary Rafferty ,,Bakee Street”, Peter Gebriel, ,,Mercy Street”, Annie Lennox ,,Love song for a Vampire” i Joe Satriani ,,Flying in a blue Dream”- pa da bude ipak top lista pet najboljih- Lynyrd Skynyrd- ,,You got that wright”.
