MAGAZIN PREPORUKA
SAVJETI: Evo kako ublažiti opekotine od sunca na prirodan način
Usljed prekomjernog izlaganja suncu tokom ljetnjih dana, nerijetko nastaju opekotine na koži, pa se stoga uvijek savjetuje da se izbjegava sunčanje u najtoplijem dijelu dana i da se nanosi krema sa zaštitnim faktorom. Ipak, ukoliko i pored ovih preporuka nastanu opekotine, postoje prirodni načini da ublažite neprijatnost i bol.
Aloe vera
Gel ove biljke ublažava crvenilo i bol i hladi opečeno mjesto.
Kokosovo ulje
Masti iz ovog ulja štite i omekšavaju kožu zahvaćenu opekotinama. Opečeno mjesto isperite hladnom vodom, a zatim peškirom utapkajte višak tečnosti. Tek onda nanesite kokosovo ulje koje će koža postepeno upiti.
Ovsena kaša
Ovsena kaša umiruje iritaciju bolnog mjesta. Napravite pastu od ovsene kaže, meda i mlijeka i nanesite na opekotinu. Ostavite da odstoji dok se ne stvrdne, a zatim isperite hladnom vodom.
Paradajz
Paradajz umanjuje iritaciju i bol. Nanesite kriške na bolno mjesto ili ubacite nekoliko paradajza u blender. Tom pastom namažite opekotinu i ostavite da odstoji dok se ne stvrdne. Zatim isperite hladnom vodom.
Soda bikarbona
Soda bikarbona takođe umanjuje bol od opekotine od sunca. Napravite pastu od sode i mlake vode i nanesite na bolno mjesto. Sodu bikarbonu možete dodati i u kadu prilikom kupanja.
Jabukovo sirće
Kupka od jabukovog sirćeta izuzetno je djelotvorna u borbi protiv opekotina.
Sirće je antiseptik i neupitno rashlađuje kožu dok isparava. Pomaže i da se uspostavi pH ravnoteža, čime ublažava peckanje i žarenje kože.
Naravno, nemojte sirće stavljati na kožu dok ga ne razblažite sa vodom.
Nemasno mlijeko i jogurt
Pomiješajte šoljicu hladnog nemasnog mlijeka sa četiri šoljice vode pa dodajte nekoliko kockica leda. U smjesu umočite gazu i napravite oblogu. Stavite oblogu na opečeno mjesto i držite ga 15 do 20 minuta. Ponavljajte svaka dva do četiri sata.
Jogurt ima sličan učinak. Nanesite jogurt na opečena mjesta. Isperite kožu prohladnom vodom i onda je nježno osušite mekim peškirom.
Zelena salata i krastavac
Skuvajte listiće zelene salate u vodi. Procijedite i ostavite tečnost da se hladi nekoliko sati u frižideru. Umočite vatu u tekućinu i razmažite je po opečenoj koži ili oprezno pritišćite vatom zahvaćeno mjesto.
Krastavci imaju prirodna analgetska i antioksidativna svojstva. Rashladite krastavce i usitnite ih u blenderu dok ne dobijete pastu. Nanesite je na opečena područja, uključujući i lice.
Hidratacija
Koža zahvaćena opekotinom je suva, zateže i peče. Stoga je važno da pijete dovoljno tečnosti i da konzumirate namirnice bogate vodom poput lubenice, krastavca, grožđa i narandži. Poenta je da ostanete dobro hidrirani, jer će tako i koža dobiti neopodnu tečnost.
Izvor: Nezavisne novine
