PREPORUKA SPORT
DIRLJIVOM PRIČOM PREVARIO SVIJET: Podršku mu dali Serena i BBC, a on je sve izmislio
Foto: Elena Grnčarova
Živimo u svijetu lažnih vijesti, a jedna takva našla se i u sportu, tačnije u tenisu, piše Gol.
Mlada teniska nada Darko Grnčarov nedavno se probudio iz kome i započeo sa svojim povratkom tenisu, i to uz podršku Serene Vilijams, Martine Navratilove i BBC-ja. Problem u ovoj dirljivoj ljudsko-sportskoj priči jest taj što ovaj mladi ,,teniser” uopšte ne postoji!
Priča je zapravo obišla gotovo cijeli svijet! A u njoj nema ni trunke istine. Nepoznati Makedonac došao je na ideju da prevari cijeli svijet i predstavi se kao teniser koji je nedavno bio u komi te je započeo sa svojim povratkom sportu. A uz to vrlo je aktivan na društvenim mrežama, pogotovo Twitteru.
Izvrijeđao četvrtfinalistu Australian Opena, zaradio intervju na BBC-ju
Tako je svojevremeno napisao da nikada ne bi zaigrao na terenu Margaret kort na Australian openu, jer je australijska teniserka nedavno, prema njegovom mišljenju, imala neke homofobne izjave. Mnogi su ga ,,retvitovali”, pa je dospio i na radar BBC-ja, koji je potom napravio intervju s njim. Tamo je otkrio da se nedavno probudio iz kome i da se nada povratku tenisu. Priča je u januaru obišla svijet, a prevarantu dala dodatni podsticaj da nastavi.
Idući mu je korak bio da zadivi najbolju teniserku svih vremena – Serenu Vilijams. Naišao je na komentar Tenisa Sandgrena, nedavnog četvrtfinaliste Australian opena, koji je prije nekoliko godina za Serenine mišiće napisao ,,odvratno”. Odgovorio mu je javno i napisao sve i svašta (tvit je obrisan).
Serena mu se lično javila, zahvalila, a poruku koju mu je ona poslala Darko Grnčarov podijelio je s makedonskim medijima.
Nastupio na televiziji i govorio o osvojenom turniru
Makedonska novinarka objasnila je da se ideja vjerovatno rodila za vrijeme predizborne kampanje u SAD-u, kada su niknuli brojni lažni profili, s lažnim vijestima, koji su skupljali veliki broj lajkova, koji su pak donosili lijepu zaradu. Jedna od ,,tvornica laži” nalazi se upravo i Makedoniji, u gradiću Velesu, odakle je Makedonac Boris zaradio hiljade dolara pišući lažne vijesti o aktuelnom predsjedniku Donaldu Trampu za vrijeme pomenute kampanje. Tu je vjerovatno i taj prevarant došao na ideju da zavara cijeli teniski svijet.
Da stvar bude još bizarnija, mladić koji se predstavljao kao Grnčarov pojavio se na makedonskoj televiziji te je ispričao kako je osvojio teniski turnir u Egiptu. Dok je pričao o svojem ,,uspjehu”, u pozadini je išao snimak s njegovog treninga na kojem se jasno vidi da je riječ o potpunom amateru koji ne zna ni da zamahne, a kamoli udari loptu. Pritom je opisivao svoj uspjeh:
– U četvrtfinalu sam igrao protiv 3. nosioca, Belgijanca. Pobijedio sam ga 6:3, 6:2.
Kada je stekao veliki broj pratilaca, prevarant je angažovao i ljude oko sebe! Njihov je zadatak bio da ga štite od onih koji pokušavaju da ga razotkriju na društvenim mrežama te da ga istovremeno veličaju preko novih lažnih profila. Ubrzo je Grnčarov postao svjetska priča, pa je vijest o ,,probuđenom teniseru iz kome” obišla zemlje poput Argentine, Italije, Španije, SAD-a…
Pretjerao u lažima pa se razotkrio
,,Makedonski teniser” objavio je na svom profilu da će u martu nastupiti na ATP turniru iz serije Masters 1000, i to ni manje ni više nego u paru s Viktorom Troickim! Srbijanski teniser vidio je tu vijest i napisao:
– Sjajno! Nemam pojma ko je to. Nikad nisam čuo za njega.
Bila je to jedna od krucijalnih grešaka koja je nagnala mnoge ozbiljnije novinare da krenu istraživati tu priču. Našli su mnoge lažne podatke koje je prevarant plasirao kako bi se izvukao s raznih intervjua dogovorenih uživo. Poput ,,umrla mi je majka”, dok osoba pod tim imenom i nedjeljama kasnije uredno objavljuje statuse na Facebook-u. Ili recimo ,,potpisao sam ugovor s jednim od najvećih sponzora u tenisu”. Naravno, nikakav ugovor s Darkom Grnčarovom nije potpisan.
Kada ga je jedan od novinara javno suočio sa svim dokazima i podacima te ga optužio za prevaru, makedonski teniser koji se probudio iz kome i krenuo u bajkoviti povratak sportu jednostavno je – nestao!
– Možda je dečko opet pao u komu – napisao je na kraju priče o najvećoj prevari u ovom sportu stvarni makedonski teniser Bešir Durguti.
Izvor: gol.dnevnik.hr
