Prema podacima iz Registra zaraznih bolesti IJZCG, stopa obolijevanja od meningokokne sepse u Crnoj Gori je niska. Iako je i u zemljama bivše Jugoslavije slična situacija, javnost je nedavno potresla vijest da je tinejdžerka iz Bosne i Hercegovine preminula od posljedica ovog oboljenja.
Sepsa označava ulazak mikroorganizma u krvi i upalnu reakciju organizma na bakterije u krvi.
– Uzročnik meningokokne sepse je bakterija službenog naziva Neisseria meningitis, poznatija pod imenom meningokok. Meningokokna infekcija se prenosi od osobe do osobe respiratornim kapljicima (kijanjem, kašljanjem, govorom, pljuckanjem) – kazao je za MNE magazin, dr Ljirim Đokaj iz podgoričkog Doma zdravlja.
Dr Đokaj ukazuje na to da su meningokokne infekcije česće zimi i u rano proljeće. Najčešće se epidemije pojavljuju u kolektivima (škole, vrtići, domovi, itd.).
– Rizične grupe su odojčad, djeca mlađa od pet godina, mladi adolescentni i odrasli 15-24 godine, pacijenti bez slezine, imunokomprimitovani, populacija starija od 65godina – pojašnjava.
Rani simptomi su: povišena tjelesna temperatura, glavobolja, povraćanje, proliv, malaksalost, petehije (koje na pritisak ne blijede, javljaju se na ekstremitetima i trupu) i ukočen vrat. Kasnije dolazi do lošeg opšteg stanja (hipotenzija, tahikardija), poremećaja svijesti, šoka, DIK…
– Dijagnostičke procedure su: kks (parametri zapaljenja i faktori koagulacije), hemokultura, lumbalna punkcija, bojanje po Gramu i dodatne pretrage u bolničkim uslovima. U liječenju se koriste intravenski antibiotici širokog spektra i drugi dodatni tretmani u bolničkim uslovima -navodi dr Đokaj.
U prevenciji se sprovodi vakcinacija rizičnih grupa, važno je održavanje higijene (higijenske mjere), nošenje maski.
– Članovima porodice i bliskim kontaktima oboljelih osoba kao lijek izbora daje se Rifampicin (odrasli 600mg na 12h, dva dana). Ljekovi drugog izbora su: fluorokinoloni, cefalosporini, itd – zaključio je dr Đokaj.
Mn.M.