NAŠE PRIČE
INDIRA FORZA ZA MNE MAGAZIN: Pripremamo najluđi doček Nove godine u ,,Splendidu”
Indira Levak, koja sada nastupa pod imenom Indira Forza, sinoć je na promociju albuma prvijenca ,,Valkira“ u podgoričkom hotelu ,,Union“ donijela upravo to – borbenost, hrabrost i pregršt pozitivne energije.
Nakon promocije za MNE magazin je govorila o albumu, autorskim tekstovima i najavila šta priprema za nastup u hotelu ,,Splendid” 31. decembra.
Valkira ima mnogo značenja. Između ostalog, brani heroje. Ko su heroji u Vašem životu?
– Ima toliko danas heroja, s obzirom na vremena koja su nam došla. Ja uvijek nekako razmišljam o muzici, ali, ima puno heroja, valkira, koje su hrabre, jake, nepobjedive, neustrašive. Ja ih poznajem, hvala Bogu i to je moje veliko bogatstvo.
Na ovom albumu potpisujete tekst za dvanaest pjesama. Koja Vam je bila najdraža za napisati?
– To su sve moja djeca i sve su pjesme u mom srcu. U svaku pjesmu sam ušla stvarno studiozno. Potpisujem ovdje pjesme za 12 muzičkih priča. Još se nisam odvažila da napišem muziku, ali sam na ovom albumu bila u društvu najboljih hrvatskih autora – Branimira Mihaljevića, Anta Pecotića, Bojana Šalamona Shalle i Domagoja Perišića. Dobila sam jednu svježinu koja mi je falila i vjerujte mi da to je tim koji ću zadržati i tu hemiju ne treba ispuštati. Trebamo sada dalje nastaviti, ja već promišljam o drugom samostalnom albumu. Nema stajanja, samo rad, rad i rad. Ono što ste me pitali, koja pjesma – svaka mi je predraga. Ima tu ta pjesmarica koju je otkrio suprug i koji je u meni podstakao ono najbolje. A onda sam htjela da tu svoju emociju podijelim sa svojom publikom. Evo, hvala Bogu, to sam i učinila. Bilo je to pomalo stidljivo, ko bi rekao da sam ja stidljiva, ali sam se odvažila i dokaz je moja publika koja se sa mnom dopisuje putem mog Facebook-a Indira Forza, a na Instagramu mi govore: ,,Odličan ti je rukopis, samo nastavi dalje pisati.“
Što publika može da očekuje od Vašeg novogodišnjeg nastupa u hotelu ,,Splendid Conference & SPA Resort“?
– Ja sam inače sinonim za dobru zabavu. Ono što uvijek očekuju od mene jesu odlična energija, puno radosti, vedrine i dobre pjesme. Najbitnije je ući u novu godinu veselo, s osmijehom na licu, a ja sam upravo ta koja će svojoj publici i gostima u ,,Splendidu“ to dati. Tako da, nemojte oklijevati nego požurite, nemojte to propustiti, pogotovo sad kad sam čula da je i moja koleginica Jelena Rozga u kombinaciji sa mnom. To ne može biti loše, taj spoj Dalmacije i Slavonije i tog temperamenta sa Crnogorcima i Crnogorkama – to mora biti najluđa noć u Crnoj Gori.
Da li je ovo prvi put da nastupate u ,,Splendidu“ za Novu godinu?
– Prvi put sam u ,,Splendidu“, ali gledajte, ja kad uradim ovu godinu, sigurna sam da će biti i sljedeće i one tamo, tako da će me svi poželjeti slušati još puno puno puta. Inače, uvijek me je krasila ta samouvjerenost, to volim kod sebe (smijeh). Prvi put nastupam u ,,Splendidu“, ali tamo uvijek odsjedam i spavam i moram priznati da uvijek me oduševi to prekrasno gostoprimstvo, ta toplina ljudi ne samo u ,,Splendidu“, nego u cijeloj Crnoj Gori. Mi se uvijek volimo, mi se uvijek grlimo kad se vidimo na ulici, poljubimo se, to me neizmjerno puni pozitivom i znam da tim ljudima sigurno moram dati sve najbolje od sebe.
Bojana Radonjić
Foto: B. Šekularac
