ZDRAVLJE

ZDRAVLJE: U Crnoj Gori nema oboljelih od glodarske kuge

20.03.2015. u 15:45

U Crnoj Gori nije zabilježen nijedan slučaj oboljelih od glodarske kuge, ali nije isto stanje u državama regiona. U Makedoniji je, recimo, zaraženo devet osoba, dok se za njih pet sumnja da su inficirani.

glodarska kuga

Iz Instituta za javno zdravlje objašnjavaju za MNE magazin kako ovu bolest izaziva bakterija koja se nalazi u prirodi kod brojnih divljih životinja, posebno zečeva, kunića i raznih krpelja.

Svako može dobiti glodarsku kugu, odnosno tularemiju, ali se najčešće javlja kod odraslih u zimskom periodu, u sezoni lova na zečeve, a kod djece tokom ljeta, kada su aktivni krpelji.

Bolest se ne prenosi sa jedne osobe na drugu. Može se prenijeti ako se jede nedovoljno kuvano meso zaraženih životinja ili ako se pije zaražena voda. Prenosiva je i rukovanjem krznom, dodirivanjem šapa životinja i putem ujeda nekih zglavkara.

-U zavisnosti od vrste dodira, tularemija može da prouzrokuje čireve na koži, natekle i bolne limfne žlijezde, upalu očiju, upalu grla ili bolest sličnu upali pluća – navode iz Instituta za javno zdravlje

Rani simptomi kod oboljelih su nagla temperatura, jeza, glavobolja, bolovi u mišićima i zglobovima, suvi kašalj i progresivna slabost. Zapaljenje pluća se može javiti kao komplikacija kod svih vrsta zaraze i zahtijeva brzo postavljanje dijagnoze i lečenje. Simptomi se mogu javiti u periodu od 1-14 dana, obično 3-5 dana.